இலங்கைப் பல்கலைக்கழகங்களுக்கு சர்வதேச கல்வி ஒத்துழைப்பு – நான்கு புதிய புரிந்துணர்வு ஒப்பந்தங்களுக்கு அமைச்சரவை அங்கீகாரம்!

இலங்கைப் பல்கலைக்கழகங்கள் மற்றும் வெளிநாட்டு பல்கலைக்கழகங்களுக்கு இடையிலான கல்வி ஒத்துழைப்புகளை வலுப்படுத்தும் நோக்கில் நான்கு புதிய புரிந்துணர்வு ஒப்பந்தங்கள் (MoUs) மேற்கொள்ள அமைச்சரவை அங்கீகாரம் வழங்கியுள்ளது.

இது, இலங்கைப் பல்கலைக்கழகங்களை உலகத் தரப்படுத்தல் சுட்டிகளுக்கு மேம்படுத்தி சர்வதேசமயப்படுத்தும் முயற்சியின் ஒரு பகுதியாகும்.

இந்த யோசனையை கல்வி, உயர்கல்வி மற்றும் தொழிற்கல்வி அமைச்சராகவும் செயல்படும் கௌரவ பிரதமர் அவர்கள் முன்வைத்திருந்தார்.

அங்கீகாரம் பெற்ற ஒப்பந்தங்கள்:

1. பேராதனைப் பல்கலைக்கழகம் ↔ சீனக் குடியரசின் புவியியல் மற்றும் புவி இயற்பியல் நிறுவகம் — 5 ஆண்டுகள் செல்லுபடியாகும் ஒப்பந்தம்.
2. களனிப் பல்கலைக்கழகம் ↔ இந்தியாவின் பாரதிதாசன் பல்கலைக்கழகம் — 5 ஆண்டுகள் செல்லுபடியாகும் ஒப்பந்தம்.
3. மொரட்டுவ பல்கலைக்கழகம் ↔ ஜப்பானின் யொகோஹோமா தேசிய பல்கலைக்கழகத்தின் பல்புலமை விஞ்ஞான நிறுவகம் — 5 ஆண்டுகள் செல்லுபடியாகும் ஒப்பந்தம்.
4. மொரட்டுவ பல்கலைக்கழகம் ↔ ஜப்பானின் டொகுயாமா தேசிய தொழிநுட்ப நிறுவகம் — 5 ஆண்டுகள் செல்லுபடியாகும் ஒப்பந்தம்.

இவை அனைத்தும் கல்வி, ஆராய்ச்சி, தொழில்நுட்பம் மற்றும் மாணவர்-விரிவுரையாளர் பரிமாற்றம் போன்ற துறைகளில் இணைந்த பணிகளை முன்னெடுக்க வாய்ப்பளிக்கும் என அமைச்சக அறிக்கையில் தெரிவிக்கப்பட்டுள்ளது.