தமிழ்நாட்டின் மதுரைக்கு தென்கிழக்கே 12 கி.மீ தொலைவில் உள்ள கீழடியில் கி.மு. 6 ஆம் நூற்றாண்டில் செழித்து வளர்ந்த பழமையான நாகரிகங்களில் ஒன்றை தொல்பொருள் அகழ்வாராய்ச்சிகள் மற்றும் கார்பன் டேட்டிங் சுட்டிக்காட்டுகின்றன.
இப்போதிலிருந்து, சுமார் 2,500 ஆண்டுகளுக்கு முன்பு இந்த பூமியில் நடமாடிய குறைந்தது இரண்டு மனிதர்களின் முகங்களை அவர்கள் கண்டுபிடித்துள்ளனர்.
மதுரை காமராஜ் பல்கலைக்கழக ஆராய்ச்சியாளர்கள் இங்கிலாந்தில் உள்ள லிவர்பூல் ஜான் மூர்ஸ் பல்கலைக்கழகத்தின் உதவியுடன் இரண்டு மண்டை ஓடுகளில் புனரமைக்கப்பட்ட முக அம்சங்களை ”மூதாதையர் மேற்கு யூரேசிய (ஈரானிய) வேட்டைக்காரர்கள் மற்றும் மூதாதையர் ஆஸ்ட்ரோ-ஆசிய மக்களின் தடயங்களைக் கொண்ட தென்னிந்தியர்கள்” என விவரிக்கிறனர்.
பிரதான அகழ்வாராய்ச்சி இடத்திலிருந்து 800 மீ தொலைவில் உள்ள கொண்டகை என்ற புதைகுழியில் இந்த மண்டை ஓடுகள் கண்டெடுக்கப்பட்டன. மரபியல் அடிப்படையிலான வம்சாவளியை இதன் மூலம் கண்டறியலாம்.
“முக தசை அமைப்பை மீண்டும் உருவாக்கவும், உடற்கூறியல் மற்றும் மானுடவியல் தரநிலைகளைப் பின்பற்றி முக அம்சங்களை மதிப்பிடவும் கணினி உதவியுடன் கூடிய 3D முக மறுசீரமைப்பு முறையைப் பயன்படுத்தினோம்,” என்று இங்கிலாந்தின் லிவர்பூல் ஜான் மூர்ஸ் பல்கலைக்கழகத்தின் ஃபேஸ் லேப்பின் இயக்குனர் பேராசிரியர் கரோலின் வில்கின்சன் கூறியுள்ளார்.
முகங்களின் கீழ் பகுதிகள் மிகவும் யூகிக்கத்தக்கவை; மேல் பகுதிகளின் மறுகட்டமைப்பு மிகவும் துல்லியமாக இருந்தது. “மண்டை ஓடுகளின் கீழ் தாடைகள் காணாமல் போனதால், மண்டை ஓடு அளவீடுகள் மற்றும் தளங்களிலிருந்து கீழ்த்தாடைகளின் வடிவங்களை மதிப்பிடுவதற்கு ஆர்த்தோடோன்டிக் தரநிலைகளைப் பயன்படுத்தினோம்,” என்று பேராசிரியர் வில்கின்சன் கூறியுள்ளார்.
உயிருள்ள மக்களின் மருத்துவப் படங்களின் ஆய்விலிருந்து உருவாக்கப்பட்ட முக மறுசீரமைப்புக்கான தடயவியல் வழிகாட்டுதல்களை ஆராய்ச்சியாளர்கள் பயன்படுத்தினர். கொண்டகையிலிருந்து மண்டை ஓடுகளின் CT ஸ்கேன் செய்யப்பட்ட படங்களைப் பெற்ற பிறகு, நவீன தென்னிந்தியர்களின் வெளியிடப்பட்ட தரவுகளைப் பின்பற்றி மண்டை ஓடுகளின் பல்வேறு புள்ளிகளில் உள்ள திசுக்களின் ஆழத்தை அவர்கள் மதிப்பிட்டுள்ளனர்.
மண்டை ஓடுகளின் பண்புகள் மற்றும் உடற்கூறியல் உறவுகளின் அடிப்படையில் முக அம்சங்களின் இடம், கண்கள், மூக்கு மற்றும் வாய் ஆகியவற்றின் அளவுகள் மதிப்பிடப்பட்ட அதே நேரத்தில், தசை, கொழுப்பு மற்றும் தோலை மீண்டும் உருவாக்க டிஜிட்டல் சிற்பத்தைப் பயன்படுத்தியுள்ளனர்.
புகைப்படத் தரவுத்தளத்தைப் பயன்படுத்தி, ஆராய்ச்சியாளர்கள் தோல், முடி மற்றும் கண்களுக்கு வண்ணங்கள் மற்றும் அமைப்புகளை ஒதுக்கியுள்ளனர். மேலும், “இது 80% அறிவியல் மற்றும் 20% கலை” என்று மதுரை காமராஜ் பல்கலைக்கழகத்தின் மரபியல் துறை பேராசிரியர் ஜி. குமரேசன் கூறியுள்ளார்.
மண்டை ஓடுகளின் படங்களை ஸ்கேன் செய்து லிவர்பூலுக்கு அனுப்பிய அவர், மறுகட்டமைக்கப்பட்ட முகங்கள், டி.என்.ஏ (DNA) தரவுகளுடன், சங்க காலத்தில் வாழ்ந்த தமிழர்களின் வம்சாவளியைக் கண்டறிய உதவும் என்று கூறியுள்ளார்.
கீழடி அதன் தொன்மைக்காக மத்திய மற்றும் மாநில அரசுகளுக்கு இடையேயான மோதலின் மையமாக இருந்து வருகிறது. கடந்த மாதம், இந்திய தொல்பொருள் ஆய்வு நிறுவனம், 2015-16 ஆம் ஆண்டில் கீழடியில் சங்க கால செங்கல் கட்டமைப்பைக் கண்டுபிடித்து, அந்த இடத்தை கிமு 8 ஆம் நூற்றாண்டு என்று தேதியிட்ட அதன் தொல்பொருள் ஆய்வாளர் கே. அமர்நாத் ராமகிருஷ்ணாவிடம், அது கிமு 3 ஆம் நூற்றாண்டை விட பழமையானதாக இருக்க முடியாது என்று கூறிய பெயர் குறிப்பிடப்படாத நிபுணர்களை மேற்கோள் காட்டி தனது அறிக்கையைத் திருத்துமாறு கேட்டுக் கொண்டனர்.
நீதிமன்றங்கள் தலையிட்ட பிறகு, 2018 ஆம் ஆண்டில், ASI யிடமிருந்து அகழ்வாராய்ச்சியை ஏற்றுக்கொண்ட தமிழ்நாடு மாநில தொல்லியல் துறை, கிமு 6 ஆம் நூற்றாண்டுக்கும் கிபி 2 ஆம் நூற்றாண்டுக்கும் இடையில் கீழடியில் 29 ரேடியோகார்பன் தேதிகளைப் பெற்றுள்ளது.
மதுரை காமராஜ் பல்கலைக்கழக ஆராய்ச்சியாளர்கள், அமெரிக்காவின் ஹார்வர்ட் பல்கலைக்கழகத்தின் மரபியல் துறையுடன் இணைந்து கொண்டகை கலசங்களிலிருந்து DNA வை பகுப்பாய்வு செய்து வருகின்றனர்
கொண்டகையில் இருந்து தோண்டியெடுக்கப்பட்ட புதைகுழிகளின் உள்ளடக்கங்களை ஆய்வு செய்த பிறகு, பெரும்பாலான எலும்புக்கூடு எச்சங்கள் சுமார் 50 வயதுடையவர்களுடையது என்று ஆராய்ச்சியாளர்கள் மதிப்பிட்டனர்.
இடுப்பு எலும்பு மற்றும் மண்டை ஓடு உருவவியல் அடிப்படையில் எலும்புக்கூட்டின் பாலினத்தை ஆராய்ச்சியாளர்கள் அடையாளம் காண்கின்றனர்.
“முகங்களை மறுகட்டமைப்பது உலகம் முழுவதும் பொதுவானது என்றாலும், தென்னிந்தியாவில், கீழடியில் முதல் முறையாக நாங்கள் அதை முயற்சித்தோம்,” என்று தமிழ்நாடு தொல்பொருள் துறையின் ஆலோசகர் தொல்பொருள் ஆய்வாளர் கே. ராஜன் குறிப்பிட்டுள்ளார்.
