நாடு தழுவிய மின் தடைக்கான சரியான காரணம் மற்றும் இலங்கையின் மின்சார அமைப்பு செயலிழக்க வழிவகுத்த நிகழ்வுகளின் வரிசையை தீர்மானிக்க தேசிய மின் கட்டமைப்பு முறைமை இயக்கம் (NSO) உள்ளக விசாரணையை ஆரம்பித்துள்ளது .
மின் உற்பத்தி நிலையம் ஒன்றின் அலகு திடீரென துண்டிக்கப்பட்டதைத் தொடர்ந்து அமைப்பு செயலிழந்தது, இது சம்பவத்தைச் சுற்றியுள்ள சூழ்நிலைகள் குறித்த விசாரணையைத் தூண்டியது என குறித்த அமைப்பு மேலும் தெரிவித்துள்ளது.
பாதுகாப்பு நடைமுறைகளின் ஒரு பகுதியாக நுரைச்சோலை நிலக்கரி மின் உற்பத்தி நிலையம் தேசிய மின் கட்டமைப்பிலிருந்து தற்காலிகமாக துண்டிக்கப்பட்டுள்ளது, இதன் விளைவாக 810 மெகாவாட் (MW) உற்பத்தி திறன் இழப்பு ஏற்பட்டுள்ளது.
எனினும், சாதகமான மழைப்பொழிவு நிலைமைகள் நீர் மின் உற்பத்தியை அதிகரித்துள்ளதாகவும், மின்சார தேவையும் ஒப்பீட்டளவில் குறைந்துள்ளதாகவும் குறித்த அமைப்பு மேலும் தெரிவித்துள்ளது.
நுரைச்சோலையில் இருந்து குறிப்பிடத்தக்க உற்பத்தி திறன் இழப்பு ஏற்பட்ட போதிலும், இந்த நிலைமைகள் மின்சார விநியோகத்தை நிர்வகிக்க உதவும் என எதிர்பார்க்கப்படுகிறது.
எதிர்வரும் நாட்களில் நுகர்வோருக்கு ஏற்படும் இடையூறுகளை குறைக்க மின்சார விநியோகம் கவனமாக நிர்வகிக்கப்படும் என தேசிய மின் கட்டமைப்பு முறைமை இயக்கம் உறுதியளித்துள்ளது.
தேசிய மின்சார அமைப்பில் ஏற்பட்ட உறுதியற்ற தன்மையைத் தொடர்ந்து அக்டோபர் 17 அன்று இலங்கை நாடு தழுவிய மின் தடையை சந்தித்தது.
இதனை அடுத்து தேசிய மின் கட்டமைப்பு முறைமை இயக்கம் மீட்பு நடவடிக்கைகளை மேற்கொண்டு, பாதிக்கப்பட்ட பகுதிகளை படிப்படியாக தேசிய மின் கட்டமைப்புடன் மீண்டும் இணைத்தது.
