இலங்கையில் குழந்தைகளிடையே அதிகரிக்கும் தொற்றா நோய்கள் !

இலங்கையில் பாடசாலை மாணவர்களிடையே நீரிழிவு, உயர் இரத்த அழுத்தம் போன்ற தொற்றா நோய்கள் அதிகரித்து வருவதாக சுகாதார அமைச்சகம் எச்சரிக்கை விடுத்துள்ளது.

சுகாதார மேம்பாட்டுப் பணியகம் ஏற்பாடு செய்த ஊடகவியலாளர் சந்திப்பில், ஊட்டச்சத்து பிரிவின் பணிப்பாளர் டாக்டர் மோனிகா விஜேரத்ன வெளியிட்ட தகவலின்படி, 2024 ஆம் ஆண்டு சேகரிக்கப்பட்ட தரவுகளின்படி, 1, 4, 7, 10 ஆம் வகுப்பு மாணவர்களில் 7% பேர் அதிக எடையுடன் உள்ளனர்.

13–17 வயதுக்குட்பட்டவர்களில் 3% பேர் உடல் பருமனும், 12% பேர் அதிக எடையுடனும் இருப்பது கண்டறியப்பட்டுள்ளது.

அதிக சர்க்கரை, உப்பு மற்றும் கொழுப்பு உள்ள உணவுகளை அதிகம் பயன்படுத்தும் பழக்கம், இத்தகைய நோய்களுக்கு காரணமாகிறது.

“இளம் வயதிலேயே நீரிழிவு மற்றும் உயர் இரத்த அழுத்தம் போன்ற நோய்கள் வருவதற்கான அபாயம் அதிகரித்துள்ளது,” என டாக்டர் விஜேரத்ன தெரிவித்தார்.