கலகொட அத்தே ஞானசார தேரர் தனது தனிப்பட்ட நண்பர் என்றும், ஆனால் சட்டத்திற்கு முன் அனைவரும் சமம் என்றும் அமைச்சர் கே.டி. லால்காந்த தெரிவித்துள்ளார்.
ஊடகங்களுக்கு கருத்து தெரிவித்த லால்காந்த, பௌத்த பிக்குகளை வேண்டுமென்றே குறிவைப்பதாகவும், பௌத்தத்தை குறைமதிப்பிற்கு உட்படுத்த முயற்சிப்பதாகவும் கூறப்படும் குற்றச்சாட்டுகளை நிராகரித்தார்.
“ஞானசார தேரரும் எனது நண்பரே. ஆனால் இந்த நாட்டில் ஒரு சட்டம் இருக்கிறது. அந்த சட்டங்களை நாங்கள் உருவாக்கவில்லை, எங்களால் அவர் இந்த நிலைக்கு வரவில்லை,” என அமைச்சர் தெரிவித்தார்.
இதேநேரம் ஞானசார தேரர் முன்னைய அரசாங்கங்களின் கீழ் முன்பு சிறையில் அடைக்கப்பட்டிருந்தார் என்பதை சுட்டிக்காட்டிய அவர், தற்போதைய சர்ச்சை துறவிக்கு எதிரான சட்ட நடவடிக்கையின் முதல் நிகழ்வு அல்ல என சுட்டிக்காட்டினார்.
ஞானசார தேரரின் நிலைமையை அரசியல் நோக்கங்களுக்காக சில எதிர்க்கட்சி குழுக்கள் சுரண்டுவதாக லால்காந்த குற்றம் சாட்டியதோடு, குறித்த பிக்கு அரசியல் நிகழ்ச்சி நிரல்களை முன்னெடுக்க மீண்டும் மீண்டும் பயன்படுத்தப்பட்டதாகக் கூறினார்.
தற்போது சிறையில் உள்ள ஏனைய பௌத்த பிக்குகள் குறித்து ஏன் இதே போன்ற கவலைகள் எழுப்பப்படவில்லை என்றும் அவர் கேள்வி எழுப்பினார்.
ஜனாதிபதி அனுர குமார திசாநாயக்க ஏற்கனவே மூத்த பௌத்த மதத் தலைவர்களுடன் இந்த விடயத்தைப் பற்றி விவாதித்ததாகவும், சட்ட சீர்திருத்தங்களை பரிசீலிக்க அரசாங்கத்தின் விருப்பத்தை வெளிப்படுத்தியதாகவும் அமைச்சர் கூறினார்.
பௌத்த அங்கியின் கண்ணியத்தை குறைமதிப்பிற்கு உட்படுத்தும் வகையில் பௌத்த பிக்குகளை தண்டிப்பதை தான் தனிப்பட்ட முறையில் எதிர்ப்பதாகவும் லால்காந்த கூறினார்.
சட்டத்தை மீறுபவர்கள் பொருத்தமான தண்டனையை எதிர்கொள்ள வேண்டும், ஆனால் மத அங்கி தண்டனைக்கு உட்படுத்தப்படக்கூடாது என்று அவர் கூறினார்.
தனிப்பட்ட வழக்குகளுக்கு வெவ்வேறு விதிகளைப் பயன்படுத்துவதை விட, ஏற்கனவே உள்ள சட்ட கட்டமைப்பில் ஏதேனும் மாற்றங்கள் முறையான கலந்தாலோசனை மூலம் செய்யப்பட வேண்டும் என்று அமைச்சர் வலியுறுத்தினார்.
