புற்றுநோய் நோயாளிகளுக்கு புற்றுநோய் சிகிச்சையை மிகவும் மலிவு விலையில் கிடைக்கச் செய்வதை நோக்கமாகக் கொண்ட ஒரு நடவடிக்கையாக, 137 புற்றுநோய் மருந்துகளின் விலையை 70% வரை குறைப்பதற்கான நடவடிக்கைகளை இந்தியா அறிவித்துள்ளது.
தேர்ந்தெடுக்கப்பட்ட மருந்துகளுக்கான வர்த்தக இலாப வரம்பை 30% ஆகக் கட்டுப்படுத்த இந்தியாவின் தேசிய மருந்து விலை நிர்ணய ஆணையம் (NPPA) எடுத்த முடிவைத் தொடர்ந்து, புதிய விலை நிர்ணய விதிமுறைகள் நவம்பர் 9, 2026 முதல் அமலுக்கு வரும் என தெரிவிக்கப்பட்டுள்ளது.
இந்தியாவின் இரசாயனங்கள் மற்றும் உரங்கள் அமைச்சு, இந்த முடிவு புற்றுநோய் நோயாளிகள் மற்றும் அவர்களது குடும்பங்கள் மீதான நிதிச் சுமையை கணிசமாகக் குறைக்கும் என எதிர்பார்க்கப்படுகிறது என தெரிவித்துள்ளது.
மார்பக, புரோஸ்டேட், பெருங்குடல், கருப்பை மற்றும் கர்ப்பப்பை வாய் புற்றுநோய்கள் உட்பட 20 க்கும் மேற்பட்ட வகையான புற்றுநோய்களுக்கான சிகிச்சைகள் இதில் அடங்கும் என கூறப்படுகிறது.
பெம்ப்ரோலிசுமாப், பெவாசிசுமாப், டர்வாலுமாப் மற்றும் ஒசிமெர்டினிப் உள்ளிட்ட பரவலாகப் பயன்படுத்தப்படும் பல புற்றுநோய் சிகிச்சைகள் புதிய விதிமுறைகளின் கீழ் உள்ள மருந்துகளில் அடங்கும்.
அதிகாரப்பூர்வ அறிவிப்பு வெளியான ஏழு நாட்களுக்குள் திருத்தப்பட்ட விலைகளை சமர்ப்பிக்குமாறு மருந்து உற்பத்தியாளர்களுக்கு அறிவுறுத்தப்பட்டுள்ளது, அதே நேரத்தில் மருத்துவமனைகள் மற்றும் மருந்தகங்கள் நவம்பர் 9 முதல் குறைக்கப்பட்ட விலைகளை அமல்படுத்த வேண்டும் என தெரிவிக்கப்பட்டுள்ளது.
தட்டுப்பாடுகளைத் தடுக்க தற்போதுள்ள உற்பத்தி மற்றும் விநியோக அளவை பராமரிக்குமாறு மருந்து நிறுவனங்களுக்கு அதிகாரிகள் உத்தரவிட்டுள்ளனர்.
2019 ஆம் ஆண்டில் அறிமுகப்படுத்தப்பட்ட இதேபோன்ற முயற்சியைத் தொடர்ந்து இந்த சமீபத்திய முடிவு எடுக்கப்பட்டுள்ளது, அப்போது இந்தியா 42 புற்றுநோய் மருந்துகளுக்கு வர்த்தக வரம்புகளை கட்டுப்படுத்தியது, இதன் விளைவாக 526 பிராண்டுகளில் 90% வரை விலை குறைப்பு ஏற்பட்டது.
மருந்து விநியோகம் மற்றும் சில்லறைத் துறைகளில் அதிகப்படியான லாபத்தைத் தடுக்கும் அதேவேளையில், புற்றுநோய் சிகிச்சைக்கான அணுகலை மேம்படுத்துவதை நோக்கமாகக் கொண்டது இந்த சமீபத்திய தலையீடு என்று அரசாங்கம் கூறியது.
எனினும், ஒவ்வொரு மருந்தின் தற்போதைய விலை நிர்ணய கட்டமைப்பைப் பொறுத்து உண்மையான விலைக் குறைப்பு மாறுபடும் என தெரிவிக்கப்பட்டுள்ளது.
