நாட்டின் முக்கிய சர்வதேச நுழைவாயிலாக விளங்கும் பண்டாரநாயக்க சர்வதேச விமான நிலையம் (BIA) பாதுகாப்பை மறுஆய்வு செய்து பலப்படுத்தும் நோக்கில், நேற்றைய தினம் (23) கட்டுநாயக்கவில் உயர்மட்டக் கூட்டம் நடைபெற்றது.
இக் கூட்டமானது துறைமுகங்கள் மற்றும் விமானப் போக்குவரத்து துணை அமைச்சர் ஜனித் ருவான் cகொடிதுவக்கு மற்றும் பாதுகாப்பு செயலாளர் ஏர் வைஸ் மார்ஷல் (ஓய்வு) சம்பத் துயகொண்டா ஆகியோரின் தலைமையில் இடம்பெற்றது.
மேலும் பாதுகாப்பு அமைச்சகத்தின் அறிக்கையின்படி, இந்தக் கூட்டம் விமான நிலைய பாதுகாப்பை மேம்படுத்துதல், சட்டவிரோத நடவடிக்கைகளைத் தடுப்பது, மேலும் சாத்தியமான அச்சுறுத்தல்களுக்கு எதிரான ஒருங்கிணைப்பு மற்றும் பதிலளிப்பு முறைகளை வலுப்படுத்துதல் போன்ற முக்கிய அம்சங்களை மையமாகக் கொண்டு நடைபெற்றது.
இக் கூட்டத்தில் உரையாற்றிய பாதுகாப்புச் செயலாளர் துயகொண்டா, தேசிய பாதுகாப்பு, பொருளாதார மேம்பாடு மற்றும் சர்வதேச இணைப்பில் பண்டாரநாயக்க சர்வதேச விமான நிலையம் வகிக்கும் முக்கிய பங்கை வலியுறுத்தினார்.
மேலும் பயணிகள், விமானக் குழுவினர், விமான நிலைய ஊழியர்கள் உள்ளிட்ட அனைவரின் பாதுகாப்பை உறுதி செய்வது மிக அவசியம் என்பதை அவர் வலியுறுத்தினார்.
அதேவேளை, அனைத்து பங்குதாரர்களின் அர்ப்பணிப்பையும் பாராட்டிய அவர், சர்வதேச விமானப் பாதுகாப்பு தரங்களை நிலைநிறுத்த தொடர்ந்து ஒருங்கிணைப்பு மற்றும் விழிப்புணர்வுடன் செயல்படுவதின் அவசியத்தை சுட்டிக்காட்டினார்.
கலந்துரையாடலின் போது பங்கேற்பாளர்கள் தங்களது துறைகளில் எதிர்கொள்ளும் நடைமுறை சவால்கள், பாதுகாப்பு நடவடிக்கைகளின் செயல்திறன், எதிர்வினை திறன் ஆகியவற்றை மேம்படுத்துவதற்கான தீர்வுகளைப் பகிர்ந்தனர்.
மேலும் அனைத்து தொடர்புடைய நிறுவனங்களுக்கிடையே நெருங்கிய ஒத்துழைப்பை மேம்படுத்தி, விமான நிலைய பாதுகாப்பு மேலாண்மைக்கான ஒருங்கிணைந்த அணுகுமுறையை உருவாக்கும் விரிவான திட்டம் ஒன்றை உருவாக்க ஒப்புதல் பெறப்பட்டது.
கூட்டத்திற்குப் பிறகு, துணை அமைச்சர், பாதுகாப்புச் செயலாளர் மற்றும் பிற மூத்த அதிகாரிகள் பண்டாரநாயக்க சர்வதேச விமான நிலைய வளாகத்துக்குச் சென்று தற்போதைய பாதுகாப்பு ஏற்பாடுகளை நேரில் ஆய்வு செய்தனர்.
இந்தக் கூட்டத்தில் துறைமுகங்கள் மற்றும் விமானப் போக்குவரத்து அமைச்சின் செயலாளர், தேசிய புலனாய்வுத் தலைவர், காவல்துறை மா அதிபர், இலங்கை சுங்க இயக்குநர் ஜெனரல், மாநில புலனாய்வு சேவையின் (SIS) இயக்குநர் ஜெனரல், விமான நிலையம் மற்றும் விமானப் போக்குவரத்து சேவைகள் (இலங்கை) தலைவர், சிவில் விமானப் போக்குவரத்து ஆணையத்தின் இயக்குநர் ஜெனரல், குடிவரவு மற்றும் குடியகல்வுத் துறையின் கட்டுப்பாட்டாளர் ஜெனரல் (சட்டப் பொறுப்பு) ஆகியோர் உட்பட பல முக்கிய அரசு நிறுவனங்களின் உயர் அதிகாரிகள் கலந்து கொண்டனர்.
