2020 ஆம் ஆண்டு நடைபெற்ற உபகரண கொள்முதல் தொடர்பான ஊழல் குற்றச்சாட்டில் முன்னாள் தலைவர் லலித் டௌலகல, நிர்வாக இயக்குநர் சந்தன கிரிசாந்த, சப்ளை மேலாளர் விஜித் புஷ்பகுமார, மற்றும் செயல்பாட்டு மேலாளர் அனுர சந்திரசேன பண்டார ஆகிய நால்வரும் இலஞ்ச ஊழல் ஆணைக்குழுவினரால் கைது செய்யப்பட்டுள்ளனர்.
விசாரணை அதிகாரிகளின் தகவலின்படி,
மணிக்கு 2,000 கிலோ மீன் செயலாக்கத்திற்கான வெய்க்யூம் பேக்கேஜிங் இயந்திரம் சட்டப்பூர்வ கொள்முதல் நடைமுறைகளை பின்பற்றாமல் வாங்கப்பட்டதாகவும், அது அவசியமற்றதாக கருதப்பட்டதாகவும் கூறப்படுகிறது. இதன் மூலம் அரசுக்கு ரூ. 58 இலட்சம் 56,116 இழப்பு ஏற்பட்டதாக குற்றச்சாட்டு எழுந்துள்ளது.
மேலும், சப்ளை மேலாளர் ஒருவர் ரூ. 1 இலட்சம் லஞ்சம் பெற்றுக் கொண்டதாகவும், அது அவரது தனிப்பட்ட வங்கி கணக்கில் வரவு வைக்கப்பட்டதாகவும் தெரிவிக்கப்பட்டுள்ளது. அந்த இலஞ்சம் ரூ. 9 இலட்சம் 28,058.20 அளவிலான சப்ளையர் பணத்தை விடுவிக்க வழங்கப்பட்டதாக கூறப்படுகிறது.
சந்தேகநபர்கள் கொழும்பு பிரதான நீதவான் நீதிமன்றத்தில் முன்னிலைப்படுத்தப்பட்ட போது, நீதிமன்றம் அவர்களுக்கு இரண்டு நபர் உத்தரவாதத்தில் தலா ரூ. 15 இலட்சம் பிணை வழங்கி, வெளிநாட்டு பயணக் கடவுச்சீட்டுகளை ஒப்படைக்க உத்தரவிட்டது.
இச்சம்பவம், கடந்த பல ஆண்டுகளாக நிதி சீர்கேடு, தவறான மேலாண்மை மற்றும் கணக்காய்வு குறைபாடுகள் காரணமாக போராடி வரும் மீன்பிடி கூட்டுத்தாபனத்தின் நிலையை மேலும் சிக்கலாக்கியுள்ளது. 2019 ஆம் ஆண்டுக்கான கணக்காய்வில் போதுமான ஆதாரங்கள் இல்லாதது மற்றும் நிதி அறிக்கைகளில் குழப்பங்கள் இருப்பதாக கணக்காய்வாளர் துறையினர் குறிப்பிட்டிருந்தனர்.
கூட்டுத்தாபனம் கடந்த காலங்களில் 270 பணியாளர்களை தன்னார்வ ஓய்வூதியத் திட்டம் மூலம் குறைத்து, சம்பளச் செலவுகளை தன்னுடைய வருவாயில் இருந்து வழங்கத் தொடங்கியதாக தெரிவித்திருந்தாலும், மீன்பிடி அமைச்சரும் இந்நிறுவனம் நீண்டகாலமாக இழப்பில் இயங்கிவருகிறது என்றும் ஊழல் மற்றும் தவறான நிர்வாகம் காரணமாக அதன் செயல்திறன் குறைந்துள்ளதாகவும் முன்பே தெரிவித்திருந்தார்.
இக்கைதுகள், மீன்பிடி கூட்டுத்தாபனத்தின் ஆட்சிமுறை மற்றும் கொள்முதல் குறைபாடுகளை வெளிச்சமிட்டதோடு, அரசு நிறுவனங்களை மீளப் புதுப்பிக்கும் சவாலையும் வெளிப்படுத்துகின்றன.
சுமார் ரூ. 6 மில்லியன் அளவிலான இழப்பு பெரியதாகத் தோன்றாவிட்டாலும், நம்பகத்தன்மை குறைந்த ஒரு நிறுவனத்திற்கு இது மேலும் பாதிப்பை ஏற்படுத்தியுள்ளது.
மீண்டும் நிலைநிறுத்தப்பட வேண்டுமெனில், CFCக்கு வெளிப்படையான கொள்முதல் நடைமுறைகள், சீர்மையான நிதி கண்காணிப்பு, மற்றும் திறமையான தலைமைத்துவம் தேவைப்படுவதாக நிபுணர்கள் கருத்து தெரிவிக்கின்றனர்.
இப்போது நீதிமன்றத்தில் வழக்கு நடைபெறுகின்ற நிலையில், மீன்பிடி கூட்டுத்தாபனம் இந்த சர்ச்சையை மாற்றத்திற்கான வாய்ப்பாக பயன்படுத்தி, ஊழல்மூலமான தோல்வியிலிருந்து மீண்டு, துறைசார் முன்னேற்றத்தின் ஒரு எடுத்துக்காட்டாக மாறுமா என்பதே கேள்வியாக உள்ளது.
