தேர்தல் காலத்தில் மக்களுக்கு வழங்கிய வாக்குறுதிகளை எவ்வாறு நிறைவேற்றுவதற்கு அரசாங்கம் திட்டமிட்டுள்ளது என்பது தொடர்பில் அரசாங்கம் உண்மையாக இருக்க வேண்டும் என சர்வஜன பலய (SB) தலைவரும் எதிர்க்கட்சி பாராளுமன்ற உறுப்பினருமான திலித் ஜயவீர வலியுறுத்தியுள்ளார்.
நேற்றைய தினம் (9) பாராளுமன்றத்தில் உரையாற்றிய ஜயவீர, அரசாங்கம் தனது விஞ்ஞாபனம் மற்றும் தெளிவான வேலைத்திட்டம் இன்றி வழங்கிய வாக்குறுதிகளை நிறைவேற்றத் தவறியுள்ளதாக குறிப்பிட்டார். மாறாக, மக்களின் கோரிக்கையை நிறைவேற்றாத பல்வேறு திட்டங்களின் மூலம் மக்களை தவறாக வழிநடத்த அரசு முயற்சிப்பதாக அவர் கூறினார்.
பல்வேறு அரசியல் இயக்கங்களால் ஏமாற்றப்பட்டு மக்கள் சோர்வடைந்துள்ளதாகவும், தற்போது இந்த அரசாங்கத்திடம் இருந்து உண்மையான மாற்றத்தை எதிர்பார்த்துள்ளதாகவும் ஜயவீர குறிப்பிட்டுள்ளார்.
“அரசியல் மேடைகளில் அவர்கள் பல்வேறு அறிக்கைகளை வெளியிட்டாலும், அவர்கள் ஆட்சிக்கு வந்ததும் இந்த வாக்குறுதிகளை நிறைவேற்ற முடியாது என்பது அவர்களுக்குத் தெரியும். இதனால் மக்கள் சலிப்படைந்துள்ளனர். மக்களை இன்னும் விரக்தியடையச் செய்ய முடியாது. எனவே, அவர்கள் அளித்த வாக்குறுதிகளை நிறைவேற்ற முடியாது என்ற உண்மையை அரசு ஒப்புக்கொள்ள வேண்டும்,” என்றார்.
தமக்கு சொந்தமான நிறுவனங்கள் தொடர்பில் அரசாங்க அரசியல்வாதிகள் முன்வைக்கும் கூற்றுகளுக்கு பதிலளித்த ஜயவீர, பாராளுமன்றத்தில் பிரவேசித்ததன் நோக்கம் பாராளுமன்றத்திற்கு பெறுமதி சேர்ப்பதே தவிர பாரம்பரிய அரசியலில் ஈடுபடுவதல்ல என குறிப்பிட்டார்.
“நாடாளுமன்றத்திற்கு மதிப்பு சேர்க்க வந்தேன். மாற்றத்தை கொண்டு வர நீங்கள் தயாராக இல்லை. மாறாக ஆதாரமற்ற குற்றச்சாட்டுகளை கூறுகிறீர்கள். ஒழுக்கமான பாராளுமன்றத்தை உருவாக்கும் முயற்சிகளுக்கு நீங்கள் தடையாக இருக்கிறீர்கள்” என்று ஜெயவீர குற்றம் சாட்டினார்.
