இலங்கைத் தமிழர்களுக்குத் தமிழ்நாட்டு மக்கள் சிறந்த பாதுகாப்பை வழங்குவார்கள் என தெரிவித்து, கச்சத்தீவுடன் யாழ்ப்பாணத்தைத் தமிழ்நாட்டிடம் ஒப்படைக்க வேண்டும் என யாழ்ப்பாண மாவட்ட நாடாளுமன்ற உறுப்பினர் அர்ச்சுனா ராமநாதன் இன்று (05) நாடாளுமன்றத்தில் தெரிவித்துள்ளார்.
நாடாளுமன்றத்தில் உரையாற்றிய அர்ச்சுனா எம்.பி, இந்திய நடிகரும் அரசியல்வாதியுமான சி. ஜோசப் விஜய்யின் சமீபத்திய தேர்தல் வெற்றிக்கு வாழ்த்து தெரிவித்தார்.
விஜய் கச்சத்தீவைக் கோரியபோது, ஜனாதிபதி அனுர குமார திசாநாயக்க மறுத்துவிட்டார் என்பதைச் சுட்டிக்காட்டிய அவர், “கச்சத்தீவுடன் யாழ்ப்பாணமும் தமிழ்நாட்டிற்கு அளிக்கப்பட வேண்டும். தமிழ்நாட்டு மக்கள் எங்களைப் பாதுகாப்பார்கள்” என கூறினார்.
வடக்குத் தீவுகளில் நிலவும் மின்சாரப் பற்றாக்குறை குறித்துக் கவலை தெரிவித்தபோது நாடாளுமன்ற உறுப்பினர் இந்தக் கருத்துக்களையும் தெரிவித்தார்.
சமீபத்தில் நெடுந்தீவிற்குச் சென்றபோது, வாரத்தில் ஐந்து நாட்கள் மாத்திரமே மின்சாரம் வழங்கப்பட்டதை தெரிந்து கொண்டதாகவும், அப்பகுதிக்குத் தடையற்ற மின்சாரத்திற்கு அரசாங்கம் எப்போது உத்தரவாதம் அளிக்கும் என்றும் அவர் கேள்வி எழுப்பினார்.
