சுவாசக் கோளாறு காரணமாக ஒருவருக்கு சுவாசிப்பதில் சிரமம் ஏற்பட்டால் மாத்திரம் வைத்தியசாலைக்கு செல்வது அவசியம் என சுகாதார அமைச்சு அறிவித்துள்ளது.
சுகாதார அமைச்சின் செயலாளர், வைத்தியர் அனில் ஜெயசிங்க வெளியிட்டுள்ள அறிக்கையில் இவ்வாறு அறிவுறுத்தல் விடுக்கப்பட்டுள்ளது.
சாதாரண காய்ச்சல் அல்லது சளி போன்ற உடல்நலக்குறைவு ஏற்பட்டால் பயந்து வைத்தியசாலைக்கு செல்ல வேண்டிய அவசியம் இல்லை எனவும் அது குறித்து வைத்திய ஆலோசனையை பெற்றுக்கொள்ளுமாறும் தெரிவிக்கப்பட்டுள்ளது.
அத்துடன், COVID-19, இன்ஃப்ளூயன்ஸா மற்றும் அனைத்து சுவாச நோய்களிலிருந்தும் பாதுகாக்க சுவாச சுகாதாரம் உள்ளிட்ட நல்ல சுகாதாரப் பழக்கங்களை கடைபிடிப்பது அவசியம் எனவும் சுட்டிக்காட்டப்பட்டுள்ளது.
இருமல் அல்லது தும்மல் ஏற்படும் போது, முழங்கை அல்லது டிஷ்யூ போன்றவற்றால் மூடுவது, முகத்தை தேவையில்லாமல் தொடுவதைத் தவிர்ப்பது, கைகளை அடிக்கடி கழுவுவது அல்லது கை சுத்திகரிப்பானைப் பயன்படுத்துவது மற்றும் அழுக்கு கைகளால் முகத்தைத் தொடுவதைத் தவிர்ப்பது நல்லது எனவும் அறிவுறுத்தப்பட்டுள்ளது.
மேலும், சுவாச நோயால் பாதிக்கப்பட்டவர்கள், நோய்வாய்ப்பட்ட நபர் முகக்கவசம் அணிவதும், மற்றவர்களுக்கு நோய் பரவாமல் தடுக்க தேவையற்ற நெரிசலான இடங்களைத் தவிர்க்குமாறு தெரிவிக்கப்பட்டுள்ளது.
இதேவேளை, உலக சுகாதார அமைப்பின் தரவுகளின்படி, “பெப்ரவரி 2025 முதல் உலகளவில் COVID-19 ஐ ஏற்படுத்தும் SARS-CoV-2 வைரஸின் செயல்பாட்டில் அதிகரிப்பு ஏற்பட்டுள்ளது.
SARS-CoV-2 வைரஸ் பரவும்போது சில மரபணு மாற்றங்களுக்கு உட்படுவது பொதுவானது. தற்போது உலகெங்கிலும் பல நாடுகளில் பதிவாகியுள்ள திரிபு, 2024 ஆம் ஆண்டில் பதிவான அதே திரிபின் துணை வகையாக அடையாளம் காணப்பட்டுள்ளது. இந்த திரிபு 2024 ஆம் ஆண்டில் இலங்கையிலும் காணப்பட்டது.
மே 2025 இல் மருத்துவ ஆராய்ச்சி நிறுவனம் (MRI) பரிசோதித்த மாதிரியும் அதே துணை வகைகளைச் சேர்ந்தது என அடையாளம் காணப்பட்டது. எனவே, இவை புதிய மரபணு மாறுபாடுகள் அல்ல, மேலும் கடுமையான நோய்கள் அல்லது பாதிப்புக்கள் எதுவும் பதிவாகவில்லை.
இலங்கை சுவாச நோய் கண்காணிப்பு அமைப்பின் கூற்றுப்படி, 2024 ஆம் ஆண்டில் இலங்கையில் SARS-CoV-2 வைரஸ் கண்டறிதலின் சராசரி விகிதம் சுவாச நோய்களால் பாதிக்கப்பட்ட நோயாளிகளின் மாதிரியில் 3% ஆக இருந்தது. அதே ஆண்டு மே மாதத்தில் இது 9.6% ஆக அதிகரித்தது. 2025ஆம் ஆண்டு இதுவரை, SARS-CoV-2 வைரஸ் கண்டறிதலின் சராசரி விகிதம் சுமார் 2% ஆக உள்ளது, மேலும் தற்போது ஒரு சிறிய அதிகரிப்பு காட்டப்படுகிறது.
அதன்படி, மே 2024 மற்றும் மே 2025 இல் பதிவான COVID-19 வழக்குகளின் எண்ணிக்கையில் அதிகரிப்பு உள்ளது. இருப்பினும், உலக சுகாதார அமைப்பின் (WHO) கருத்தின்படி, இந்த வைரஸின் எதிர்கால நடத்தை குறித்து எந்த முடிவுகளும் எட்டப்படவில்லை, மேலும் அதன் அவதானிப்பு இன்னும் ஆராய்ச்சி நிலையில் உள்ளது.
கடந்த சில ஆண்டுகளுடன் ஒப்பிடும்போது, இந்த நேரத்தில் நிலவும் வானிலை நிலைமைகளின் கீழ் இன்ஃப்ளூயன்ஸா போன்ற நோய்கள் அதிகரிப்பது வழக்கம். சுகாதார அதிகாரிகள் நோய் பரவலை தொடர்ந்து கண்காணித்து வருகின்றனர். எனவே, பொதுமக்கள் இது குறித்து தேவையற்ற அச்சம் கொள்ள வேண்டாம்.” என அந்த அறிக்கையில் தெரிவிக்கப்பட்டுள்ளது.
