2026 ஆம் ஆண்டிற்கான உலகின் முன்னணி சுகாதாரச் சுற்றுலாத் தலமாக இலங்கை தேர்ந்தெடுக்கப்பட்டுள்ளது.
BookRetreats.com வெளியிட்ட சமீபத்திய ‘State of Retreats 2026’ அறிக்கையில் இந்த விடயம் குறிப்பிடப்பட்டுள்ளது.
இந்தத் தளத்தில் தேடல் ஆர்வம் கடந்த ஆண்டுடன் ஒப்பிடுகையில் 100% அதிகரித்ததை பதிவு செய்ததன் மூலம், அவுஸ்திரேலியா (85%), மொராக்கோ (83%), இங்கிலாந்து (82%) மற்றும் ஸ்பெயின் (80%) ஆகிய நாடுகளை விட இலங்கை முதலிடத்தில் இருப்பதாக அறிக்கை தரவரிசைப்படுத்தியுள்ளது.
இலங்கையின் இந்த வளர்ச்சிக்கு அதன் நீண்டகால ஆயுர்வேத பாரம்பரியம், மலிவு விலை மற்றும் இயற்கை எழில் கொஞ்சும் இடங்களே காரணம் என குறித்த தரவுத்தளம் கூறியுள்ளது. கண்டி பகுதியில் சுகாதார பயணங்கள் சுமார் 373 அமெரிக்க டொலர்களில் இருந்து தொடங்குவதாகவும், இது ஐரோப்பாவில் உள்ள இதே போன்ற அனுபவங்களை விட கணிசமாக மலிவானதாக இருப்பதாகவும் அது குறிப்பிட்டது.
இதேவேளை 40 நாடுகளில் இருந்து வரும் சுற்றுலாப் பயணிகளுக்கான விசா கட்டணத்தை நீக்க இலங்கை அண்மையில் எடுத்த முடிவு, இந்தத் தீவில் சுகாதாரமான விடுமுறைகளை இன்னும் கவர்ச்சிகரமானதாக மாற்றியுள்ளது என்றும் அந்த அறிக்கை சுட்டிக்காட்டியது.
நல்வாழ்வுச் சேவைகளுடன், உலகின் மிகப்பெரிய காட்டு யானைக் கூட்டம் மற்றும் நீலத் திமிங்கலங்களைக் காணும் வாய்ப்புகள் உள்ளிட்ட இலங்கையின் வனவிலங்குகளையும், ஆண்டு முழுவதும் செயல்படும் கடற்கரை சுற்றுலாத் தலங்களையும் பயணிகளுக்கான முக்கிய கவன ஈர்ப்பாக அந்த அறிக்கை குறிப்பிட்டுள்ளது.
இந்தத் தரவரிசைகள் BookRetreats.com தளத்தில் உள்ள சுற்றுலாத் தலங்களுக்கான தனித்துவமான பக்கப் பார்வைகளில் ஆண்டுதோறும் ஏற்படும் அதிகரிப்புகளை அடிப்படையாகக் கொண்டவை. அதே சமயம், இந்த விரிவான அறிக்கையானது, டிசம்பர் 2025 மற்றும் ஜனவரி 2026-க்கு இடையில் 1,040 அமெரிக்கப் பயணிகளிடம் நடத்தப்பட்ட ஒரு கணக்கெடுப்பின் முடிவுகளையும் உள்ளடக்கியுள்ளது.
