சுங்கத் தீர்வைகள் செலுத்தப்படாது நாட்டுக்குள் சட்டவிரோதமாக இறக்குமதி செய்யப்பட்ட இரண்டு வாகனங்களைப் பதிவு செய்த குற்றச்சாட்டில், ஹோமாகம – பிட்டிபன பகுதியைச் சேர்ந்த நபர் ஒருவர் இலஞ்சம் மற்றும் ஊழல் தொடர்பான விசாரணை ஆணைக்குழுவினால் (CIABOC) கைது செய்யப்பட்டுள்ளார்.
குறித்த இரண்டு வாகனங்களை, மோட்டார் போக்குவரத்துத் திணைக்களத்தின் அதிகாரிகளுடன் இணைந்து கணினி கட்டமைப்பில் உள்ளீடு செய்து, சட்டவிரோதமான முறையில் உரிமை மாற்றங்களைச் செய்து கொடுத்ததாக குறித்த நபர் மீது குற்றம் சாட்டப்பட்டுள்ளது.
முறையான சுங்க அனுமதி மற்றும் தீர்வைகளைச் செலுத்தாது இறக்குமதி செய்யப்பட்ட மேற்படி வாகனங்களுக்கு, போலி ஆவணங்கள் மற்றும் முறையற்ற பரிமாற்றங்கள் மூலம் அதிகாரப்பூர்வ வாகனப் பதிவுச் சான்றிதழ்களைப் பெற்றுக்கொடுக்க இந்த நபர் உடந்தையாக இருந்துள்ளார் எனத் தெரிவிக்கப்படுகிறது.
கைது செய்யப்பட்ட சந்தேகநபர், ஹோமாகம நீதவான் நீதிமன்றில் நேற்று முன்னிலைப்படுத்தப்பட்டார்.
வழக்கை விசாரித்த நீதவான், சந்தேகநபரை எதிர்வரும் ஜூலை 10 ஆம் திகதி வரை விளக்கமறியலில் வைக்குமாறு உத்தரவிட்டுள்ளார்.
இலஞ்சம் மற்றும் ஊழல் பற்றிய விசாரணை ஆணைக்குழு இந்தச் சம்பவம் தொடர்பில் மேலதிக விசாரணைகளைத் தொடர்ந்து முன்னெடுத்து வருகின்றது.
