19 பயணிகளை ஏற்றிச் செல்லும் வகையில் வடிவமைக்கப்பட்ட சீனாவின் உள்நாட்டிலேயே உருவாக்கப்பட்ட CE-25A மின்சார வணிக விமானம், ஷான்டோங் மாகாணத்தின் பின்ஷோவில் தனது முதல் ஆளுடன் கூடிய சோதனைப் பறப்பை வெற்றிகரமாக நிறைவு செய்துள்ளது. இது அந்நாட்டின் மின்சார விமான மேம்பாட்டில் ஒரு முக்கியமான மைல்கல்லாகும்.
சீன அரசு ஒளிபரப்பாளரான CCTV News மற்றும் Xinhua செய்தி நிறுவனத்தின் கூற்றுப்படி, 10 டன் எடை கொண்ட இந்த விமானம் சனிக்கிழமை (14 நவம்பர்) அன்று இரண்டு விமானிகள் மற்றும் ஒரு பறப்பு சோதனை பொறியாளருடன் சோதனைப் பறப்பை மேற்கொண்டது.
இந்த சோதனை 57 நிமிடங்கள் 46 வினாடிகள் நீடித்தது. அதில் 16 நிமிடங்கள் 38 வினாடிகள் வானில் இருந்தது. அந்த நேரத்தில் விமானம் 60.4 கிலோமீட்டர் தூரம் பயணித்தது.
விமான உற்பத்தியாளரான Commercial Aircraft Corporation of China (COMAC) நிறுவனம் இது குறித்து கூறுகையில், சோதனை முழுவதும் விமானம் சீராக இயங்கியதாகவும், அனைத்து செயல்திறன் குறிகாட்டிகளும் எதிர்பார்ப்புகளை பூர்த்தி செய்ததாகவும் தெரிவித்தது.
CE-25A விமானம் COMAC இன் முதல் மின்சார வணிக விமானமாகும். இது முதன்மையாக நகரங்களுக்கு இடையேயான குறுகிய தூர பயணிகள் சேவைகளுக்காக வடிவமைக்கப்பட்டுள்ளது.
இந்த விமானம் அதிகபட்சமாக 10 டன் எடையுடன் புறப்படும் திறன் கொண்டது. மணிக்கு 300 கிலோமீட்டர் வேகத்தில் பறக்கும். 2,400 மீட்டர் உயரத்தில் பறக்கும். 400 கிலோமீட்டர் தூரம் வரை பறக்கும் திறன் கொண்டது என தெரிவிக்கப்பட்டுள்ளது.
விமான எரிபொருளால் இயங்கும் வழக்கமான விமானங்களைப் போல் அல்லாமல், CE-25A விமானம் பகிர்ந்தளிக்கப்பட்ட மின்சார உந்துவிசை அமைப்பைப் பயன்படுத்துகிறது. இதில் மின்சாரத்தால் இயங்கும் விசிறிகள் இறக்கைகளில் பொருத்தப்பட்டுள்ளன.
இந்த விமானம் COMAC நிறுவனத்தால், சீன பேட்டரி உற்பத்தியாளரான Contemporary Amperex Technology Co. Limited (CATL), ஷாங்காய் ஜியாவ் டோங் பல்கலைக்கழகம் மற்றும் பிற பங்காளர்களுடன் இணைந்து உருவாக்கப்பட்டு வருகிறது.
சனிக்கிழமை நடந்த இந்த சாதனை, 2026 பெப்ரவரி 2 ஆம் திகதி நடந்த விமானத்தின் முதல் ஆளில்லா தானியங்கி பறப்பைத் தொடர்ந்து வந்துள்ளது.
சீன ஊடகங்களின் கூற்றுப்படி, இந்த விமானம் தனது மேம்பாட்டு திட்டத்தின் ஒரு பகுதியாக 19 ஆளில்லா தானியங்கி பறப்பு சரிபார்ப்பு சோதனைகளை நிறைவு செய்துள்ளது.
சீனாவின் சிவில் விமானப் போக்குவரத்து நிர்வாகம், இந்த விமானத்தின் வகை சான்றிதழுக்கான விண்ணப்பத்தை ஏற்றுக்கொண்டுள்ளது. இது விமானம் வணிக பயணிகள் சேவையில் நுழைவதற்கு முன்பான ஒரு முக்கியமான ஒழுங்குமுறை நடவடிக்கையாகும்.
சமீபத்திய வெற்றிகரமான சோதனை, பிராந்திய வணிக விமானப் போக்குவரத்திற்காக மின்சாரத்தில் இயங்கும் விமானங்களை உருவாக்குவதற்கான சீனாவின் முயற்சிகளில் மற்றொரு படியாகும். எனினும் CE-25A விமானம் இன்னும் வழக்கமான பயணிகள் சேவைக்கான சான்றிதழைப் பெறவில்லை என குறிப்பிடப்பட்டுள்ளது.
