நாட்டின் அரச ஆயுர்வேத மருத்துவ பீடங்களில் தற்போது நிலவும் குறைபாடுகளை ஆராய்ந்து அவற்றுக்கு உரிய தீர்வுகளை வழங்கும் நோக்கில், சுகாதாரம் மற்றும் ஊடக அமைச்சர் டாக்டர் நளிந்த ஜயதிஸ்ஸவின் தலைமையில், கல்வி மற்றும் உயர்கல்வி பிரதி அமைச்சர் டாக்டர் மதுர செனவிரத்னவின் பங்கேற்புடன், சுகாதார மற்றும் ஊடக அமைச்சில் அண்மையில் விசேட கலந்துரையாடல் ஒன்று நடைபெற்றது.
இக்கலந்துரையாடலில், நாட்டிலுள்ள அரச பல்கலைக்கழகங்களில் சுதேச மருத்துவப் பட்டப்படிப்புகளுடன் தொடர்புடைய மருத்துவப் பயிற்சியை முறைப்படுத்துதல், ஆயுர்வேதம், சித்த மற்றும் யுனானி மருத்துவ மாணவர்களுக்கான பயிற்சி, சுதேச மருத்துவப் பட்டதாரிகளுக்கு வேலைவாய்ப்பை உருவாக்குதல், மேலும் சித்த மருத்துவ மருந்துகளுடன் தொடர்பான குறைபாடுகளை ஆராய்தல் போன்ற முக்கிய பிரச்சினைகள் குறித்து விரிவாக கலந்துரையாடப்பட்டது.
அமைச்சர் டாக்டர் நளிந்த ஜயதிஸ்ஸ, உடனடியாக தீர்க்கக்கூடிய பிரச்சினைகளை அதிகாரிகளுடன் ஆலோசித்து தீர்வுகளை வழங்க நடவடிக்கை எடுத்ததுடன், நீண்டகால தீர்வுகளை வழங்குவதற்கான சாத்தியக்கூறுகளையும் ஆராய்ந்தார்.
இந்தக் கலந்துரையாடலில் பங்கேற்ற மாணவர் பிரதிநிதிகள் தங்களது கருத்துக்களையும் ஆலோசனைகளையும் நேரடியாக அமைச்சரிடம் முன்வைக்க வாய்ப்பு பெற்றனர். மாணவர் சங்கங்களின் பிரதிநிதிகளும் பல பயனுள்ள யோசனைகள் மற்றும் ஆலோசனைகளை முன்வைத்தது குறிப்பிடத்தக்கது.
இக்கலந்துரையாடலில் சுகாதாரம் மற்றும் வெகுஜன ஊடக அமைச்சகம், கல்வி மற்றும் உயர்கல்வி அமைச்சகம், பல்கலைக்கழக மானியங்கள் ஆணையம், ஆயுர்வேதத் துறை, தேசிய சுதேச மருத்துவ நிறுவனம், கொழும்பு, கம்பஹா விக்ரமாராச்சி, யாழ்ப்பாணம் மற்றும் கிழக்கு பல்கலைக்கழகங்களின் சுதேச மருத்துவ பீடங்களின் பீடாதிபதிகள் மற்றும் மாணவர் பிரதிநிதிகள் பங்கேற்றனர்.
இந்தக் கலந்துரையாடல், நாட்டின் சுதேச மருத்துவக் கல்வி துறையின் மேம்பாட்டிற்கும் மாணவர்களின் தொழில்முறை முன்னேற்றத்திற்கும் வழிவகுக்கும் ஒரு முக்கியமான முயற்சியாகக் கருதப்படுகிறது.
