நிலக்கரி கொள்முதல் விவகாரத்தை தொடர்ந்து எரிசக்தி அமைச்சர் குமார ஜயகொடி தாமதமாகவே பதவி விலகியுள்ளார் என ஸ்ரீலங்கா பொதுஜன பெரமுன (SLPP) நாடாளுமன்ற உறுப்பினர் நாமல் ராஜபக்ச விமர்சித்துள்ளார்.
ஜயகொடிக்கு எதிரான நம்பிக்கையில்லாத் தீர்மானத்தின் மீது நாடாளுமன்றம் ஒரு நாள் முழுவதும் விவாதித்த போதிலும், தேசிய மக்கள் சக்தி (NPP) நாடாளுமன்ற உறுப்பினர்கள் அனைவரும் அதற்கு எதிராக வாக்களித்ததை ராஜபக்ச சுட்டிக்காட்டினார்.
இது, நாட்டிற்கு பல மில்லியன் ரூபாய் இழப்பை ஏற்படுத்திய நிலக்கரி ஒப்பந்தம் தொடர்பான ஊழல் குற்றச்சாட்டுகளைப் புறக்கணிப்பதற்கும், அதற்கு மறைமுகமாக ஆதரவளிப்பதற்கும் சமம் என்று X தளத்தில் வெளியிடப்பட்ட ஓர் அறிக்கையில் ராஜபக்ச குறிப்பிட்டுள்ளார்.
“அமைச்சரின் பதவி விலகல், ஏற்கனவே இழந்த பணத்தை ஈடுசெய்யாது. இறுதியில், இந்த மாபெரும் மோசடியின் சுமையை நுகர்வோரே தாங்குகின்றனர்,”
மேலும், எரிசக்தி அமைச்சரின் மீது ஊழல் குற்றச்சாட்டுகள் இருந்தபோதிலும், இத்தகைய சக்திவாய்ந்த பதவியில் அவரை நியமித்ததற்கு ஜனாதிபதி அனுர குமார திசாநாயக்க பொறுப்பேற்பாரா என்றும் அவர் கேள்வி எழுப்பியுள்ளார்.
ஊழல் குறித்து விசாரணைக் குழு (BoI) விசாரணையைத் தொடங்கிய பின்னரும், ஜனாதிபதி ஜெயகோடியைத் தொடர்ந்து ஆதரித்து வந்தார் என்று ராஜபக்ச சுட்டிக்காட்டினார்.
“ஊழல் அம்பலமான பின்னரும், ஒரு வருடத்திற்கும் மேலாக அமைச்சரைப் பாதுகாத்ததால், நுகர்வோருக்குப் பெரும் இழப்பை ஏற்படுத்திய இந்த நிலக்கரி ஊழலுக்கு ஜனாதிபதியே நேரடியாகப் பொறுப்பேற்க வேண்டும்,” என்று ராஜபக்ச வலியுறுத்தியுள்ளார்.
தரமற்ற நிலக்கரி இறக்குமதி குறித்து ஜனாதிபதியால் நியமிக்கப்பட்ட விசேட ஜனாதிபதி ஆணைக்குழுவின் வெளிப்படையான விசாரணைக்கு வழிவகுக்கும் வகையில், எரிசக்தி அமைச்சர் குமார ஜெயகோடி நேற்று (17) தனது அமைச்சு பதவியை இராஜினாமா செய்தமை குறிப்பிடத்தக்கது.
